GENERAL SANTOS CITY – Dismayado ang Sangguniang Panlungsod sa dugay na nga wala paghatag sa honorarium sa mga miembro sa Barangay COVID-19 Control Force(BCCF) sa dakbayan.
Sa sesyon sa konseho gibutyag ni Kagawad Franklin Gacal nga wala pa mapagawas sa LGU ang pondo alang sa honorarium sa mga BCCF members.
Dugay nang na-aprubahan sa ilang opisina ang maong pondo apan hangtod sa pagkakaron bisag usa ka higayon wala pa gayud nadawat sa BCCF.
Dugang pa niiini, sa unang semana pa sa Agosto na-aprub ang P48 Million alang sa duha ka bulan nga honorarium sa BCCF og gisunod na ang laing P48 Million alang sa laing duha ka bulan.
Sa pamahayag pa sa opisyal, napungot na kaayo ang mga BCCF members tungod sa kadugay na nila nga gabantay sugod pa niadtong Hunyo apan hangtod karon walay nadawat nga honorarium.
Nanawagan si Gacal sa City Mayors Office nga paspasan ang paghikutar sa mga dokumento.
Kahibaluan nga adunay 11,988 BCCF members sa dakbayan kung asa mudawat og tig-P2,000 matag bulan nga honorarium.
