GENERAL SANTOS CITY – Lima ang patay, usa ang kritikal, duha ang angol human ang natigayong banggaanay sa topdown ug depasaheruan nga van sa highway sa Brgy Apopong pasado ala-5:00 kagahapon sa hapon.
Sa imbestigasyon sa Traffic Management Unit -GenSan, anaa sa inner lane ang topdown paingon sa direksyon sa Polomolok, South Cotabato. Nabangga kini sa van nga anaa sa kasugat nga lane, padulong sa direksyon sa Makar.
Nag-overtake matud pa kini sa usa ka tricycle hinungdan nga nabangga ang kasugat nga topdown.
Gikabutyag nga tungod sa kakusog sa pagkabangga, nangalagpot ang mga sakay sa topdown.
Ang mga namatay giilang sila si Josefina Requintosa, 65-anyos, taga-Puting Bato, Calumpang; mabdos nga si Lenny Rose Sobreo, 30-anyos, driver nga si Antonio Sobreo Jr; Annilyn Rose Sobreo, 2-anyos, nga pulos residente sa Prk Bayanihan, Polomolok; samtang nagpabilin pa sa tambalanan ang kauban nila nga 11-anyos nga si Mary Joy Requintosa gumikan sa naangkon nga head injury.
Nagpabilin usab sa tambalanan ang mga sakay sa van nga sila si Joana Marie Arancillo, 15-anyos, taga- Cahilsot, Calumpang, ug Loren Arsolo, taga-Prk Acharon, Labangal, gumikan sa naangkon nga mga samad.
Samtang, misibat matud pa ang driver sa van nga gipanag-iyahan sa nagpangalan ug Almira Bukayan, taga-Camella Homes ning siyudad. Padayon pang giimbestigahan sa TMU ang naasoy’ng disgrasya sa dalan.
