GENERAL SANTOS CITY – Nagpadala na og medicaL team ang lokal nga panggamhanan sa Sarangani ngadto sa Brgy Upper Suyan Malapatan Sarangani human ang report nga adunay 22 katao na ang namatay samtang anaa sa 100 pa ang nagkasakit tungod matud pa sa tipdas.
Sa pakighinabi sa Bombo Radyo, gibutyag ni Kapitan Boyet Ogan sa Upper Suyan, nagpadayon pa ang gipahigayong assessment sa municipal health office sa Malapatan.
Apan sa bahin sa MHO gitawag nila ang maong kaso nga suspected measles o tipdas gumikan gihulat pa ang confirmatory test sa blood samples gikan sa 13 ka mga bata nga gipadala sa kauluhan. Sa iyang pamahayag nga sa miaging Nobyembre 3 may namatay og dayon paspas nga adunay sunod-sunod nga namatay og nagsakit.
Gibutyag niini, gumikan sa kalayo sa lugar og walay punerarya ilubong gilayon ang biktima kung mamatay.
Ang panawagan ni Kap. Ogan sa katawhan nga kung may sakit ang mga bata ilugsong dayon aron matambalan gilayon.
Ang mga apektado nga lugar mao ang Sitio Upper Kyogam, Lower kyogam, Sitio Lino, Sitio Mahayag og sa Sitio datal Nay.
Nasayran nga naka-isolate karon sa tulo ka lawak sa Diagan Hospital ang 15 ka pasyente tungod sa tipdas.
Kasagaran niini mga bata nga ang pinakabata edad og upat ka bulan og may usa ka mabdos nga pito ka bulan nang nagsabak.
