Misaka na sa dili moubos sa 250 ka pet owners ang misang-at og reklamo batok sa mga tag-iya sa Ahjay Paws Aftercare Pet Crematorium sa Bacoor City, Cavite.
Matud ni Bacoor Mayor Strike Revilla, gikumpirma ni City Police Chief Lt. Col. Alexie Desamito ang maong gidaghanon sa mga mireklamo.
Mas taas kini kumpara sa unang naitalang 53 ka complainant human midaghan pa ang mga pet owner nga miduol sa mga otoridad aron kuwestiyonon ang serbisyo sa maong crematorium.
Gisusi usab sa mga otoridad ang 20 ka sudlanan nga gituohang adunay abo sa mga hayop nga gisumiter sa mga mireklamo.
Magpahigayon og laboratory examination ang Philippine National Police Forensic Group aron matino kung tinuod ba nga mga nahibilin sa ilang mga binuhing hayop ang sulod niini.
Nagpadayon usab ang mga imbestigador sa pagpangolekta og mga ebidensya kalabot sa posibleng mga iregularidad sa operasyon sa maong establisemento.
Nahinumdoman nga nagsugod ang imbestigasyon human nadiskobrehan ang 25 ka patayng lawas sa mga iro ug iring nga giingong gilabay sa usa ka bakanteng lote sa San Jose del Monte City, Bulacan.
