Gitugotan gihapon ang mga indibidwal nga nag-edad og 65 anyos hangtod wala pa moabot sa ilang ika-71 nga kaadlawan nga modonar og dugo, basta regular silang blood donors ug walay napalabay nga tuig sa ilang pagdonar.
Matud ni Johnny Fuscablo, kinahanglan nga matag tuig nagdonar og dugo ang maong mga indibidwal aron makapadayon sila sa pagdonar bisan lapas na sa 65 anyos, basta makapasar gihapon sa health screening.
Kalabot niini, giawhag niya ang publiko nga moapil sa Dugong Bombo 2026 nga ipahigayon sa Nobyembre 14, 2026, sa Robinsons Place General Santos City, gikan alas 6:00 sa buntag hangtod alas 5:00 sa hapon.
Gilauman nga pinaagi sa maong kalihokan, madugangan ang suplay sa dugo nga magamit sa mga pasyente nga nagkinahanglan niini, ilabina kadtong anaa sa emerhensiyang kahimtang.
Gipahinumdoman usab ang mga interesado nga siguruhong angay ang ilang panglawas ug kwalipikado sa pagdonar aron luwas ang proseso ug makatabang sa pagluwas sa kinabuhi sa ubang tawo
