GENERAL SANTOS CITY -Nanghinaut si Carlos Calinawan, officer in charge karon sa Brgy. Tambler ning syudad nga wala na untay mahitabo nga pagpanghilabot og mga butang kung ugaling magpahigayon ug search warrant operation.
Wala may pangalan nga gilitok apan ang pahayag sa nasampit punting ngadto sa mga sakop sa PDEA-12 human nga gialegahan ang mga sakop niini nga responsable sa pagkawala sa ubay-ubay sa mga gamit dihang gisulod ang panimalay ni Kapitan Abdul Wahid Bualan.
Sa pahayag kaniya dihang sila nagkaistorya, gibutyag sa kapitan nga daghan ang nawala nga gamit sa ilang panimalay nga panag-iya sa mga anak ug asawa.
Lakip ang daghang bulawan nga alahas sama sa relo, aryos, bracelet ug uban pa ingon usab mga cellphone, mahalon nga bag lakip gikuha matud pa atul sa raid sa PDEA ang pitaka sa anak ni Kapitan Bualan nga adunay P25,000.
Gani giangkon sa nahisgutan nga siya karon ang gibinlan ni Kapitan Bualan sa pagdumala sa Barangay Hall tungod mibakasyon ang Kapitan kauban ang pamilya human kini nakapiyansa giatubang nga kaso.
Kahinumduman nga kaniadtong byernes gisulod sa mga sakop sa PDEA-12 ang balay sa Kapitan Bualan sa Prk. Camaichili , Tambler ug nakuhaan matud pa ug 10 ka gramu sa shabu.
Kahibaluan nga human sa alegasyon, gipalagpot ni PDEA Director Gil Castro ang usa agent nga gilambigit sa pagpangawat gawas nga aduna pay laing duha ang gipanid-an nga posebli usab nga palagputon sa serbsiyo.
