GENERAL SANTOS CITY – Gikatakdang ipailawom sa imbestigasyon sa Bureau of Immigration-Gensan, ang duha ka Indonesian nationals nga gidakop sa mga otoridad.
Kini human giaresto ang duruha nga giilang sila si Patt Boon ug Jinky Rado nga pulos taga Tajona, Indonesia, human midunggo dinhi sa dakbayan partikular sa Lower Makar, Labangal, miaging Biyernes.
Matud ni Pedrito Lopez, BID alien control officer, kutob lamang unta sa Batuganding ang duha ka mga langyaw, base sa ilang mga dokumento, apan miabot dinhi sa dakbayan, ug midunggo sa Lower Makar Labangal.
Gikabutyag nga kung miagi lang unta sa Batuganding ang duha ka langyaw, dili na unta kini dakpon tungod mapakita niini sa otoridad ang nahisgutang card nga tatakan sa ilang buhatan.
Apan tungod may gitawag nga crossing boarder ang BID, hinungdan nga makasuhan ang duruha.
Gawas niini, kahibaluan nga nakuhaan usab ang mga nasampit ug 110 ka pakete sa sigarilyo gikan sa ilang nasud.
