GENERAL SANTOS CITY -Nagtuo si Arnel Antiporda, boxing analyst sa dakbayan nga nangita na lang ug ‘excuse’ si Top Rank big boss Bob Arum human nga gibasol ang kampo ni Manny Pacquiao human nga mapildi kini kay Australian boxer Jeff Horn.
Matud pa ni Antiporda, gusto lamang ni Arum nga mapangitaan ug sayop ang fighting senator human nga siya ang gibatikos sa pipila ka fans sa kontrobersiyal nga engkwentro.
Imposible matud pa nga walay nasayran si Arum kon aduna gayoy hokos pokos nga natigayon sa pacquiao-horn fight.
Sa statement, gibutyag ni Arum nga niadtong una pa man, gipahimangnuan na ang Filipino boxer nga dili balewalaon ang katakos ni Horn.
Gikadugang ni Arum nga walay angayang basulon ang fighting senator kon dili ang iyang kaugalingon tungod sa sobra pagka-confident sa engkwentro.
Sa bahin usab ni Pacquiao, direktang gibutyag ni Aquiles Zonio ang media relations chief sa senador nga daw bugnaw na ang pagtagad ni Arum sa kanila.
Kini tungod posibleng ulahing away na nila ilawom sa Top Rank. Giakusahan usab si Arum nga nakakita na og bag-ong alaga pinaagi ni Horn.
