GENERAL SANTOS CITY – Biyaheng Brisbane, Australia ang Team Pacquiao sa Sabado, Hunyo 24, usa ka semana una ang engkwentro kay Jeff Horn.
Sa pakighinabi sa Bombo Radyo GenSan kay assistant trainer Buboy Fernandez, giklaro niini nga magpadayon gihapon ang training ni WBO welterweight champion og Senator Manny Pacquiao aron mapabilin ang 100 perent nga kondisyon sa panglawas ug kaandam sa mga nahibiling adlaw nila sa dakbayan.
Gibutyag ni Fernandez nga anam-anam nang paubsan ang rounds sa sparring sessions ni Pacquiao, ilabina nga nakab-ot na niini ang peak og 100 percent nang andam alang sa engkwentro kay Horn.
Nasayran nga mikuha ang Team Pacquiao og direct flight gikan sa GenSan diretso sa Brisbane, Australia, kon asa musakay ang ilang entourage sa 300-seater plane.
Kumpiyansa usab si Fernandez nga dili malisdan sa pag-adjust sa klima ang fighting senator pag-abot sa Australia.
