GENERAL SANTOS CITY – Personal nga midangop dinhi sa sibyahanan ang usa ka babaye aron matabangan ang ilang kabanay nga usa ka OFW didto sa Jeddah, Saudi Arabia.
Giila ang Pinay DH nga si Nenalyn Bariga Salot, 32 anyos, minyo nga adunay usa ka anak, nga residente sa Prk. Dos. Trento Agusan Del Sur.
Pagsaysay sa Bombo Radyo ni Lea Bistuyong, ig-agaw sa maong Pinay, hilabihan na ang ilang kaguol kon unsa na ang sitwasyon karon ni Nenalyn sa kamot sa iyang among Arabo.
Kini human nga nagpaabot og mensahe nga nangayo og tabang kanila gumikan sa pagmaltrato sa iyang amo.
Gibutyag ni Bistuyong, pagsaysay kaniya ni Nenalyn nga wala siya ginapakaon og wala na gisuweldohan sukad niadtong Dec 31, 2016 hangtud karon luyo sa padayong pagtrabaho.
Sumala pa, gitawagan na nila ang True Force International Manpower Incorporation, agency ni Nenalyn apan mibalibad nga kaila nila ang nasampit.
Niduol na usab sila sa DFA dinhi sa dakbayan aron matabangan sa ilang problema apan nasuta nga wala sa ilang listahan si Nenalyn.
Gani, nanawagan ang pamilya kay Pangulong Rodrigo Duterte nga sila matabangan aron mapauli dinhi sa nasud ang nasampit.
