Gikuwestiyon pag-usab ni Vice President Sara Duterte ang sugyot sa gobyerno nga paggamit og mga balde isip pagpangandam sa posibleng epekto sa El Niño sa nasud.
Sa iyang pakigpulong sa mga overseas Filipino worker o OFW sa Hong Kong kagahapo, Nobyembre 8, giingon ni Duterte nga dili igo ang pagpangandam pinaagi sa pagbutang og mga balde aron makatigom og tubig-ulan, ilabi na kung mosangpot sa grabeng hulaw ang gipaabot nga epekto sa El Niño.
Matod sa Bise Presidente, kinahanglan nga mas lapad ang pagpangandam sa gobyerno, ilabi na sa pagsiguro nga adunay igong suplay sa pagkaon panahon sa posibleng kakulang sa tubig.
Dugang pa usab niya nga base sa mga pasidaan sa mga eksperto, posibleng moabot sa grabeng hulaw ang epekto sa El Niño, diin posibleng mauga ang mga tinubdan sa tubig.
Gibug-atan ni Duterte nga kinahanglan adunay konkretong plano ang gobyerno aron matubag ang posibleng epekto niini sa suplay sa pagkaon ug panginabuhian sa mga Pilipino.
Ang pahayag sa Bise Presidente gisundan sa sugyot ni Pangulong Ferdinand Marcos Jr. nga mag-andam og mga balde aron makatigom og tubig-ulan isip kabahin sa pagpangandam sa gipaabot nga El Niño.
