GENERAL SANTOS CITY – Dili pa klaro sa mga otoridad kung unsa ang motibo sa pagpusil patay sa jeepney driver sa Labangal National Highway ning syudad kagahapon.
Kahinumduman nga ang biktima ang nailhan sa pangalan nga si Abdullah Saddam, 27-anyos nga taga Prk. 11-C Brgy. Fatima ning dakbayan.
Sa insiyal nga imbestigasyon sa Makar Police station sa kaso, natigayon ang pagpamusil samtang namasada ang biktima gikan sa Fisfport kauban ang iyang konduktor nga si Norsidik Angkaw.
Pag-abot sa Calumpang, nakakarga ug duha ka pasahero ang biktima nga magpahatud matud pa sa Mindanao Polythecnic College.
Apan pag-abot sa National Highway Labangal atbang sa SSS GenSan, nadunggan ang sunod-sunod nga buto sa pusil og nakit-ang nagkadugo na ang biktima.
Niadtong higayuna, tayming nga miagi ang patrol car sa Kiamba Municipal POlic e Station hinungdan nga girespondihan ang insidente ug gilayon nga gidala sa Dr. Jorge P Royeca hospital ang biktima.
Apan pag-abot sa ospital, nahunusan na kini sa kinabuhi human nga nakaangkon ug daghang samad-pinusilan sa ulo og abaga.
Nagtuo ang kapulisan, dako ang kasuko sa mga suspek sa biktima.
Kahibaluan nga nakuha sa kapulisan ang basiyo sa caliber 45 pistol sulod sa jeep.
Samtang ang duha ka suspek ang gisugat og motorsiklo nga walay plaka ug misibat pasulod sa KPS labangal.
