GENERAL SANTOS CITY – Nahunusan na sa kinabuhi nga gidala sa ospital ang usa ka batan-on human ang pagbanggaanay sa duha ka motorsiklo atubangan sa MSU sa Brgy Fatima ning dakbayan alas 6:30 kagabie.
Ang namatay ang giila nga si John Romer Madarable, 17 anyos nga taga Makar Labangal nga nakaangkon og bun-og sa ulo og samad sa tuong tiil.
Samtang angol ang ig-agaw nga backrider niya nga si Mark Anthony Bokbok, 15 anyos taga 39.2 FVR Village Fatima, kinsa bali ang tiil.
Gibutyag nga pauli na ang mga biktima sakay sa XRM dihang nakasugat og nagbanggaanay ang laing motorsiklo nga gisakyan ni Ritchelyn Bolitche, 40 anyos nga taga 39.2 FVR Village Fatima.
Nakaangkon ang maong ginang og pangos sa mga kamot og bun-og sa ulo. Samaron usab ang kauban nga si Arsinet Amoto, 38, taga Greenville Calumpang, nakaangkon ug mga bun-og og samad sa tiil og ulo hinungdan nga gipangdala sa ospital.
Sa pakighinabi sa Bombo RAdyo, gibutyag ni Merlita Madarable, ang inahan sa namatay nga biktima nga, wala siya kabalo nga gisundo sa iyang anak ang ig-agaw sa Fatima tungod ang pananghid lamang kaniya nga mupalit sa tindahan.
Gibutyag nga busy na usab sa panimalay sa pamilya Madarable kagabie gumikan adunay salu-salo tungod graduation kagahapon sa manghud sa biktima sa elementarya og tulo ka ig-agaw.
Samtang, gibutyag sa inahan nga graduating sa high school ang namatay ang anak sunod tuig.
Sa pagkakaron padayon ang imbestigasyon sa Highway Patrol Group kung kinsa ang may pagkulang sa insidente
