GENERAL SANTOS CITY- Padayong giimbestigahan sa Traffic Management Unit ang natigayong aksidente sa dalan kagabii sa Polomolok, South Cotabato.
Gikalambigitan kini sa usa ka public utility van nga gimanehuan ni Bonifacio Peligro, 43 anyos, taga- Lerio, Polomolok, ug 10-wheeler truck nga maneho ni Emelito Valdueza, 28 anyos, taga-Sta. Maria Davao Occidental.
Sa inisyal nga imbestigasyon, nagsunod lamang ang duha ka sakyanan sa Matin-ao, Polomolok, kung asa paliko ang truck pasulod sa feed mill partikular sa TATEH Aqua Feeds, dihang kalit nga misumpot ang van nga maoy hinungdan sa pagbanggaanay nga gikaangol sa driver niini ug pagkaguba pag-ayo sa maong sakyanan.
Gilayong gidala sa balay-tambalanan si Peligro, driver sa van, nga nadiskubrehan nga lango sa ilimnung makahubog.
Human sa aksidente, gipalahos una ang 10-wheeler truck sa naasoy’ng factory sa feeds aron idiskarga ang dala niining mga sinako sa feeds sa hayop.
Samtang sa laing bahin, patay ang usa ka motorista human usab malambigit sa aksidente sa dalan. Giila ang biktima nga si Michael Reyes, 22 anyos, residente sa Prk Saludin, Brgy Labangal ning dakbayan.
Sa impormasyon, bandang alas-8:00 kagabii samtang pauli na ang biktima sakay sa iyang motorsiklo dihang nabanggaan sa usa ka tricycle.
Gilayong misibat ang driver sa tricycle, samtang ang biktima ang nadala pa sa balay-tambalanan kung asa siya nakabsan sa kinabuhi.
Nasayran nga nakainom usab ang nasampit nga biktima, subay sa pagsuta sa mga otoridad.
