GENERAL SANTOS CITY – Samaron nga gidala sa balay-tambalanan ang usa ka motorista human mibangga sa poste.
Giila ang nasampit nga si Jero Bradilla, residente sa Brgy Lagao ning dakbayan. Sa impormasyon, natigayon kini alas-12:52 kaganihang kaadlawon, samtang gisubay sa nasampit ang national highway atubangan sa usa ka subdivision sa Brgy Lagao.
Gituuhang lango sa ilimnung makahubog si Bradilla, hinungdan nga nawad-an ug kontrol ug mibangga sa poste.
Nasayran nga lagpot ang nasampit gikan sa iyang motorsiklo hinungdan nga nawad-an ug panimuot dihang gidala sa balay-tambalanan.
Hinuon, minor lamang nga mga bun-og ug samad nga naangkon sa nasampit nga motorista tungod sa naasoy’ng aksidente, apan gitambagan sa mga doktor nga magpabilin una sa ospital.