GENERAL SANTOS CITY – Wala nabalaka si GenSan Mayor Ronnel Rivera human marekober ang litrato sa iyang pamilya sa sako nga may unod nga IED components nga gibilin sa nagpailang Al Khilafa Philippines sa Lumatil, Maasim, Sarangani Province.
Matud kang Atty Doan Balboa, tigpamaba sa mayor, dako ang pagsalig niini sa iyang mga security personnel.
Apan mas mag-amping ug magmabinantayon na lamang matud pa si Mayor Rivera ug iyang pamilya.
Wala usab matud pa sila nasayod kon asa nakuha sa grupo ang litrato sa iyang pamilya kauban ang pipila ka indibidwal, apan posibleng sa Facebook lamang matud pa kini gikan.
Kahinumduman nga gikumpirma ni P/Inspector Reymund Paba sa Maasim Municipal Police Station ang pagkakaplag sa nasampit nga litrato sa pamilya nilang Mayor Rivera ug uban pang mga indibidwal sa sulod mismo sa sako nga gisudlan sa mga sangkap sa eksplosibo.
