GENERAL SANTOS CITY – Nagpabiling balhug sa San Isidro Police Station upat ka suspek matud pa sa pagpanglugos sa babaye nila nga barkada.
Sa impormasyon, gikabutyag nga nag-inom matud pa kagabii ang mga suspek nga gilangkuban sa duha ka lalaki ug duha ka babaye, kauban ang biktima, sa usa ka imnanan.
Miadto matud pa sila sa usa ka boarding house kung asa nila gipadayon sa pag-inum.
Apan dihang hilabihan na kahubog ang biktima, nangluya matud pa siya apan namatikdan nga migamit ug iligal nga droga ang upat nga kauban.
Kalit matud pa siyang gigunitan sa duha ka babaye nga suspek sa iyang mga kamot ug tiil, samtang ang duha ka lalaki ang maoy mihimo sa pagpanamas-tamas sa iyang lawas.
Maayo na lamang nga nakakita matud pa siya ug higayon nga musibat ug midiretso sa nasampit nga presinto sa kapulisan.
Gilayong miresponde ang mga pulis ug naabtan ang mga suspek hinungdan nga gibalhug.
Samtang narekober sa ilang posisyon ang mga aluminum foil nga may drug residue.
Giimbestigahan na sa kapulisan ang maong insidente, samtang gipaabot ang mamahimong resulta sa medical examination sa biktima kon tinuod nga nahilabtan sa mga suspek.
