Gibutyag ni Police Col. Eric De Venancio, City Director sa General Santos City Police Office, nga pito ka mga indibidwal ang ilang gituohang nalambigit sa pagpamusil nga nahitabo sa National Highway, Purok Olarte, Barangay Labangal, General Santos City.
Ang biktima giila nga si Wilson Villajuan, 60 anyos, usa ka land guard, nga namatay human maigo sa mga bala.
Human sa insidente, gilunsad sa kapulisan ang hot pursuit operation diin nadakpan ang usa ka lalaki nga giila sa alyas “Jun,” usa ka sikad driver. Nakuha gikan kaniya ang nagkalain-laing armas nga gisulod sa usa ka sako, apan iyang gilimod ang kalambigitan sa pagpamusil ug miingon nga dili iya ang maong sako.
Ang mga armas gidala na sa kustodiya sa kapulisan ug ipailalom sa forensic examination aron matino kung adunay kalambigitan sa nahitabong krimen.
Sumala sa inisyal nga imbestigasyon, posibleng away sa yuta o land conflict ang motibo sa pagpamusil. Padayon ang imbestigasyon ug hot pursuit operation sa GSCPO aron madakpan ang tanang responsable sa maong insidente.
