GENERAL SANTOS CITY – Naghinam-hinam ang pamilya sa mga atleta nga taga-Gensan nga pauli na human miapil sa Arafura Games sa Darwin, Australia nga natigayon miaging semana.
Kahibaluan nga mibiyahe gikan sa Australia pauli dinhi sa Pilipinas ang mga pambato sa nasud human ang malampusong kompetesyon.
Kahibaluan nga lima ka mga taga-Gensan ang miapil sa maong torneyo, partikular sa athletics ug swimming.
Ug gani, nakasakmit og tulo ka gold, tulo ka silver ug usa ka bronze medals si Krisha Joanna Apin, nga maoy nakaangkon ug gold medal sa 800 freestyle indibidwal, sa 4X100 medley relay ug 400X 100 mix relay; silver medal sa 400 freestyle individual ug sa 4X100 medley relay og 200 backstroke individual; ug bronze medal sa 100back stroke individual.
Samtang silver medalist ang swimmer nga si Russel Owen Latore sa relay.
Samtang silver medalist usab sa Javelin Throw ug bronze medalist sa Discus Throw ug athletics si Franz Jonard Lorejo; samtang silver medalist sa 4X100 relay og silver medalist sa 4X400 relay and hybrid relay si Jayson Buenacosa; ug silver medalist sa 4X400meters relay and hybrid relay si Al Nhaquiev Sappari.
Kahibaluan nga sa pahayag sa Philippine Sports Commission (PSC), gibutyag ni PSC national training director Marc Velasco nga kuntento sila sa gipakitang performance sa mga atletang Pinoy nga misabak sa maong torneyo.
