Giaprobahan sa World Bank (WB) ang USD287.24 milyones nga loan aron pondohan ang Philippine Digital Infrastructure Project (PIDP) nga nagtumong sa pag-ayo ug pagpalambo sa internet access sa kapin sa 20 milyones ka Pilipino.
Si Department of Information and Communications Technology (DICT) Secretary Ivan John Uy niingon nga ang PIDP mopakatap og high-speed internet sa 772 ka sites sa Mindanao ug molugway sa broadband coverage ngadto sa 10,259 ka underserved areas.
Kini nga proyekto naglakip sa pagpalambo sa usa ka nasudnong fiber optic backbone nga mopalapad sa koneksyon ngadto sa hilit nga mga rehiyon sa Kabisay-an ug Mindanao.
Ang PIDP gi-endorso sa National Economic and Development Authority Board ug nahiuyon sa Philippine Development Plan 2023-2028.
