Nagpasidaan ang Partido Demokratiko Pilipino–Lakas ng Bayan batok sa mga mosuporta sa impeachment case ni Vice President Sara Duterte.
Sumala sa partido, dili nila dawaton sa ilang hanay ang mga magbabalaod nga moboto pabor sa impeachment ug ila kining i-blacklist ug dili tugotan nga modagan ubos sa PDP–Laban sa umaabot nga eleksyon.
Giingon usab nga posible silang magbutang og kaatbang nga kandidato batok sa mga niini, isip kabahin sa ilang gitawag nga “political accountability” ug dili kuno hulga.
Sa laing bahin, gipahibalo ni VP Sara sa usa ka interbyu sa The Hague, Netherlands nga siya usa ka “presumptive candidate” human sa iyang deklarasyon sa intensyon nga modagan sa pagka-presidente.
Padayon usab ang pag-uswag sa impeachment complaints batok kaniya sa House Committee on Justice human maaprubahan ang Articles of Impeachment, nga naglakip sa mga alegasyon sa sayop nga paggamit sa P612.5 milyon nga confidential funds ug uban pang akusasyon.
Ang impeachment report gikatakdang ibutang sa plenaryo sa Kamara alang sa botohan nga nagkinahanglan og 106 ka boto sa dili pa kini ipasa sa Senado nga magsilbing impeachment court.
