Gipahibalo ni Pangulong Ferdinand Marcos Jr. kagahapong adlawa, Domingo nga hingpit nang naapula ang dakong sunog sa Navotas sanitary landfill nga milungtad ug pipila ka semana sukad niadtong Abril 10.
Sumala sa Pangulo, iyang giila ang padayon nga panagtinabangay sa mga ahensya sa gobyerno ug pribadong sektor aron mapalong ang sunog ug maprotektahan ang mga komunidad nga naapektuhan.
Lakip sa mga niresponde mao ang mga bombero, lokal nga gobyerno, environmental teams, Department of Public Works and Highways, Department of Transportation, ug uban pang ahensya sa gobyerno.
Nagpasalamat usab si PBBM sa tabang sa pribadong sektor sama sa San Miguel Corporation, Prime Infra, ug SM Prime nga mitabang sa pagseguro sa kaluwasan sa mga residente sa palibot sa maong lugar, ingon man sa suporta sa gobyerno sa Japan.
Bisan pa nga naapula na ang sunog, giingon sa Pangulo nga magpadayon gihapon ang trabaho sa gobyerno pinaagi sa 24/7 monitoring, air ug water quality testing, thermal scanning, ug health monitoring sa mga residente ug responders.
