Nakadawat og tig-₱200,000 ang matag usa sa 26 ka barangay sa General Santos City ubos sa Socio-Civic Projects Fund, nga adunay kinatibuk-ang kantidad nga ₱5.2 milyon gikan sa nasudnong gobyerno.
Katunga sa maong pundo o ₱100,000 ang gigahin alang sa scholarship program, diin lima ka iskolar sa matag barangay makadawat og tig-₱20,000 isip tabang sa ilang edukasyon.
Ang nahibiling ₱100,000 matag barangay gamiton alang sa pagpalit og mga kagamitan ug pagpatuman sa mga proyekto nga gikinahanglan sa komunidad.
Nagpasalamat si General Santos City Mayor Lorelie Geronimo-Pacquiao kang Pangulong Ferdinand Marcos Jr. ug sa mga ahensya sa nasudnong gobyerno tungod sa padayon nilang suporta ug paghatag og pundo alang sa mga programa nga makabenepisyo sa mga barangay sa dakbayan.
