GENERAL SANTOS CITY – Usa patay, usa samaron sa natigayong disgrasya tali sa motorsiklo og traysikel sa Fatima Fil-Am Road ning dakbayan.
Nakabsan sa kinabuhi sa ospital ang driver sa motorsiklo nga si John Kent Habagit nga residente sa lugar. Nakaangkon ug grabeng samad sa ulo og lawas ang nasampit human nga nalagpot gikan sa maneho nga motorsiklo.
Sa imbestigasyon sa GenSan Traffic Management Unit pauli na si Habagit sa ilang balay og kusog ang padagan niini sa iyang motorsiklo og nabanggaan ang traysikel nga anaa sa iyang unahan.
Sa kakusog sa impact sa pagkabangga sa motorsiklo, naligid ang tryasikel sa dalan og nalagpot ang driver nga si Reynaldo Ingko nga taga Employees Village Brgy. Fatima.
Nakaangkon ang driver sa traysikel og mga pangos sa nagkadaiyang parte sa lawas.
Samtang ang driver sa motorsiklo ang gidala pa sa ospital human sa pagkadisgrasya apan pipila ka oras human nga giatiman sa mga doktor nahunusan sa iyang kinabuhi.
