Gisaulog karong adlawa sa tibuok kalibutan ang World Radio Day isip paghatag og bili sa papel sa radyo sa paghatag og impormasyon, edukasyon ug kalingawan sa katawhan. Ang maong selebrasyon gipahibalo sa UNESCO niadtong 2011 ug gi-endorso sa United Nations General Assembly niadtong 2012 isip opisyal nga international day. Gipili ang maong petsa tungod kay Pebrero 13, 1946 natukod ang United Nations Radio.
Tumong sa World Radio Day ang pagpalig-on sa access sa radyo ilabi na sa mga komunidad nga limitado ang koneksyon sa internet ug telebisyon. Gipasidunggan usab niini ang papel sa radyo sa pagpalambo sa demokrasya, pagpanalipod sa human rights, ug pagdasig sa social inclusion ug kalinaw. Ang ideya niini migikan sa Spanish Radio Academy ug gisuportahan sa nagkalain-laing organisasyon sa tibuok kalibutan.
Sa Pilipinas, daghang radio stations ang naglusad og espesyal nga mga programa ug segments aron ipakita ang kahinungdanon sa radyo sa komunidad, labi na sa panahon sa kalamidad diin kini maoy unang tinubdan sa mga pahimangno ug opisyal nga impormasyon.
Lakip sa mga nag-una sa industriya ang Bombo Radyo Philippines nga gitukod niadtong 1966 sa Iloilo City. Pinaagi nilang silang Marcelino Florete Sr. ug sa paglabay sa panahon, mitubo kini ug karon nagdumala sa 32 ka AM ug FM stations sa tibuok nasud ubos sa pagpanguna ni Chairman Dr. Rogelio M. Florete ug President/CEO Margaret Ruth C. Florete ug karong tuiga, magtimaan usab ang network sa ika-60 nga anibersaryo niini.
Bisan sa pagsaka sa digital media, nagpabilin nga lig-on, dali maabot ug kasaligan nga medium ang radyo sa pag-alagad sa katawhan. Ang World Radio Day nagsilbing pahinumdom sa gahum sa tingog nga nagkonektar sa matag Pilipino bisan asa man sila
