GENERAL SANTOS CITY – Gilaumang kasuhan ugmang adlawa, Lunes, ang mga suspek nga nasikop miaging gabii sa gipahigayong ‘One Time Bigtime ug Search Warrant Operation’ sa mga otoridad sa managlaing lugar sa Brgy. Poblacion, Polomolok, South Cotabato.
Ang nahisgutang operasyon ang gipangunahan ni Police Chief Insp. Giovanni Ladeo, Deputy Chief Police Sr/Insp. Hernan Gabat ug Provincial Public Safety Company sa South Cotabato kung asa upat ka search warrant ang gipatuman.
Target niini ang managsuon nga silang Pedro Ranes ug Bruno Ranes sa Asocena St. Brgy Poblacion, kung asa luyo nga wala nasikop ang mga nasampit, sa unang panimalay nakuha ang 15 ka sachet sa shabu.
Sa ikaduhang panimalay nga gipanag-iyahan ni Juanito Ranes, walay nakumpiska nga droga, apan narekober ang 11 ka pakete sa gidiling droga sa usa ka abandonadong sakyanan.
Samtang sa laing operasyon sa panimalay ni Leonil Norcos kung asa lakip gidakop silang Elebert, Bernie Norcos ug nagpangalan ug Bombet Alhas.
Kini human nakuha ang caliber 45 pistol ug mga chop-chop nga pyesa sa motorsiklo, gawas sa iligal nga droga.
