Nagpagawas og update ang International Criminal Court kabahin sa kahimtang ni kanhi Presidente Rodrigo Duterte samtang nakapriso sa The Hague.
Matod sa ICC Registry, gikonsiderar si Duterte isip usa ka “elderly detained person” nga adunay taas nga risgo sa pagkahulog, busa gipailalom siya sa padayon nga pagbantay sulod sa iyang selda.
Gipasabot sa ICC nga sa pipila ka talagsaong higayon nga natumba si Duterte, dali dayong mitubag ang custody staff aron tabangan siya ug gilayon usab kini og medikal nga pagtan-aw.
Gibutyag usab sa ICC nga wala pay natala nga insidente sa pagkahulog sulod sa miaging 30 ka adlaw.
Dugang pa sa ICC, gihimo na ang mga gikinahanglang pagbag-o sa iyang selda ug mga gamit aron masiguro ang kaluwasan ug kaharuhay sa kanhing pangulo.
Apan, wala gibutyag ang detalye sa iyang mga chronic ailments tungod sa medical confidentiality.
Si Duterte, nga 81 anyos na, nag-atubang og mga kaso nga crimes against humanity kalabot sa giyera batok sa ilegal nga droga ug sa giingong Davao Death Squad.
Niadtong Abril 23, 2026, gikumpirma sa ICC ang mga kaso batok kaniya, lakip ang murder ug attempted murder.
Ang maong update gikan sa ICC gitumong aron ipakita nga padayon nilang ginabantayan ang kahimsog ug kaluwasan sa kanhing pangulo samtang nagapadayon ang pag-uswag sa iyang kaso.
