Gibutyag ni Vice President Sara Duterte nga mas angay nga sa Davao City ipahimutang ang giplanong house arrest alang sa iyang amahan nga si dating Pangulong Rodrigo Duterte.
Sumala sa Vice Presidente , mas komportable ug mas kasaligan ang seguridad sa Davao alang sa iyang amahan tungod kay mao man kini ang lugar nga dugay na nilang gipuy-an ug mas pamilyar usab ang mga otoridad dinhi sa pagpanalipod sa seguridad sa pamilya Duterte.
Gipahayag usab ni VP Sara nga usa kini ka paagi aron masiguro nga normal ug malinawon ang kahimtang sa dating Presidente samtang nag-atubang sa mga isyu nga gihikay batok kaniya.
Samtang, wala pa maghatag og klarong detalye ang kampo sa dating Presidente kalabot sa legal nga proseso ug posibleng kondisyon sa house arrest, apan gipasabot sa Bise Presidente nga buot niyang mapahimutang kini sa Davao aron mas dali kini matutukan sa pamilya.
Sa pagkakaron, nagpadayon ang diskusyon bahin sa kahimtang ni dating Pangulong Duterte samtang gipaabot ang opisyal nga desisyon gikan sa korte ug sa mga ahensya nga may kalabutan.
