GENSAN– Hugtanong gipanghimakak ni City Vice Mayor Edmar Yumang nga babag siya sa unsa mang lakang sa lokal nga panggamhanan alang sa pagpaanindot og pagpalambo sa Gensan.
Kini ang pahayag sa bise mayor sa mga social media posts nga nagkanayong siya supak sa “Mallengke’.
Kini human nga gibasura sa Ombudsman sa gipasaka niya nga kaso kontra kang Mayor Lorelie Pacquiao, pipila ka konsehal og empleyado sa syudad.
Gibutyag ni VM Yumang, girespito niya ang maong desisyon apan wala nagpasabot nga siya uyon niini.
Sa iyang pamahayag nga ang gibabagan niya mao ang dili husto nga proseso nga giagihan sa ‘unsolicited proposal’ alang sa maong proyekto.
Gihingusgan sa bise mayor nga angay nga mag-agi og magsunod sa mga balaod ang pagpatukod sa Mallengke.
Nahisgutan sa reklamo ni VM Yumang ang giingong paglapas sa Republic Act 3019 o Anti-Graft and Corrupt Practices Act ug ang mga alegasyon sa grave misconduct ug serious dishonesty may kalabotan sa P2.3 billion nga re-development project sa GenSan Public Market nga gipatuman sa Robinsons Land Corporation.
