Upat ka gasoline station sa dakbayan sa General Santos ang giisyuhan og show cause order human namatikdan ang dili awtorisadong pagpa-usbaw sa presyo sa ilang mga produktong petrolyo.
Kini base sa resulta sa inspeksyon ug monitoring nga gihimo sa mga miyembro sa City Price Coordinating Council (CPCC) sa nagkalain-laing gasoline station sa syudad aron masiguro nga nasunod ang hustong presyo sa lana.
Sa ilang nahimong pagmonitor, nasuta nga adunay upat ka gasoline station nga nagpatuman og pagtaas sa presyo nga wala pa maaprobahan o wala motakdo sa giila nga presyuhan sa mga produktong petrolyo.
Sumala kang Atty. Rowi Malayag sa Business Permits and Licensing Division, gihatagan og 24 oras sa Department of Energy ang mga nasangpit nga gasoline station aron ipadayag ang ilang rason human silang nasilbihan og show cause order.
Ang maong lakang kabahin sa padayon nga pagbantay sa lokal nga gobyerno ug sa CPCC aron mapugngan ang dili makatarunganong pagsaka sa presyo sa lana ug maprotektahan ang interes sa mga konsumidor sa dakbayan sa General Santos.
