GENSAN- Gipadayag ni School Division Superintendent Isagani Dela Cruz ang iyang dakong garbo sa kalampusan sa mga atletang mipartisipar sa kompetisyon human gideklara ang General Santos City nga overall champion sa bag-o lang nahuman nga SRAA Meet 2026, usa ka dakong dungog nga nagpamatuod nga dakbayan usa ka “Home of the Champions.”
Sumala kang Dela Cruz, ang maong kalampusan bunga sa lig-on nga kooperasyon sa mga ginikanan ug sa padayon nga pinansyal nga suporta sa Local Government Unit (LGU), ilabina sa training ug paghatag og incentives sa mga atleta.
Tungod niini, iyang gidasig ang mga kabatan-onan nga ipadayon ug pakusgan pa ang ilang paningkamot aron mas molampos sa umaabot nga Palarong Pambansa.
Isip kabahin sa iyang mga plano alang sa mas taas nga lebel sa kompetisyon, gipunting usab niya ang panginahanglan sa pag-hire og mga eksperto ug kanhi mga atleta nga makatabang sa pagpalambo sa kahanas sa mga estudyante.
Gipasabot usab niya ang kamahinungdanon sa hustong nutrisyon aron mas mapalig-on ang lawas ug mapauswag pa ang performance sa mga atleta sa ilang gipiling mga dula.
