Gipahibalo ni Councilor Dominador Lagare III nga posible nga i-‘delay’ ang pagpatuman sa pagtaas sa pamasahe sa mga traysikol sa General Santos City kung adunay dugang subsidiya nga moabot gikan sa Lokal nga pang gobyerno.
Matod ni Lagare, ang maong pamaagi gituyo aron maprotektahan ang mga komyuter ug masiguro nga kaya pa sa katawhan ang adlaw-adlaw nga gasto sa transportasyon, ilabina sa panahon nga padayon ang paglihok sa presyo sa mga suplay ug fuel.
Iyang gipasiugda nga ang lokal nga pang gobyerno nagtan-aw sa kahimtang sa duha ka sektor — ang mga drayber nga nagdepende sa kita sa pamasahe, ug ang mga pasahero nga apektado sa bisan unsang pagtaas sa presyo.
Apan kung walay dugang subsidiya nga moabot gikan sa national o lokal nga gobyerno, giingon ni Lagare nga didto na ipatuman ang aprobado nga fare adjustment sumala sa regular nga proseso.
Matod pa niya, importante nga adunay balanse nga solusyon aron dili maapektuhan ang serbisyo sa transportasyon ug ang kapasidad sa katawhan sa pagbiyahe adlaw-adlaw.
