Gipagawas sa Philippine National Police (PNP) ang ilang pahayag kalabot sa nagkalat nga mga alegasyon sa social media nga gipugngan kuno sa usa ka hotel sa Bonifacio Global City o BGC ang kagawasan sa kanhi household staff member ni Vice President Sara Duterte ug upat pa ka indibidwal.
Lakip sa mga alegasyon ang pagpugos kanila sa pagpirma sa usa ka affidavit nga adunay mga dili tinuod nga pahayag, lakip na ang mga hulga sa ilang kinabuhi. Matod sa PNP, seryoso ang maong mga alegasyon tungod kay posibleng may kalabotan kini sa ilegal nga pagpugong sa kagawasan, pagpamugos ug pagpanghulga.
Base sa beripikasyon sa kapulisan, niadtong Nobyembre 17, 2026, miduol sa Fort Bonifacio Police Sub-Station 1 sa Taguig City ang duha ka abogado sa kanhing household staff aron mangayo og tabang sa kapulisan. Gihangyo nila ang mga pulis nga mouban kanila sa usa ka hotel sa BGC aron kuhaon ang kanhing kawani ug upat pa ka indibidwal nga giingong gipugngan didto.
Dali usab nga miresponde ang mga pulis ug giubanan ang mga abogado sa hotel. Pag-abot didto, nakita sa kapulisan ang lima ka indibidwal nga walay timailhan nga gipugngan ang ilang kagawasan ug wala usab nagreport og dihadihang hulga sa ilang kaluwasan. Boluntaryo usab silang nanaog gikan sa ilang tagsa-tagsa ka kuwarto ug miuban sa mga pulis padulong sa presinto.
Apan sa estasyon sa kapulisan, nagdumili ang lima ka indibidwal sa paghimo og kaugalingon nilang sinumpaang salaysay kalabot sa giingong pagpugong kanila. Wala usab sila magtudlo kon kinsa ang responsable sa insidente o kon asa naggikan ang mga hulga sa ilang kinabuhi.
Bisan pa niini, gipasalig sa PNP nga andam silang modawat og pormal nga reklamo ug sinumpaang salaysay gikan sa bisan kinsang nag-angkon nga gihulga, lakip ang paghatag og tukmang tabang ug proteksiyon subay sa balaod.
Gipasiugda usab sa pambansang kapulisan nga nagpabilin silang apolitikal nga institusyon ug walay gipalabi sa mga isyung may kalabotan sa politika.











