Nagtuo ang ubang mga senador nga maayong pilion si Senador Sonny Angara isip kalihim sa Department of Education hulip sa ni-resign nga Bise Presidente Sara Duterte.
Matod ni Senate President Francis “Chiz” Escudero, si Angara usa ka maayong pagpili isip DepEd secretary.
Matud pa niya nga pipila ka mga suod sa Presidente ang nangutana kaniya kon kinsa ang angayan nga mahimong sekretarya ug ang iyang nahunahunaan ug gihisgutan mao lang si Angara.
Alang kang Senador JV Ejercito, maayong pilion si Angara isip DepEd Secretary ug nanghinaot siya nga makonsiderar ang senador.
Matud pa niya nga dili siya segurado kon dawaton ba ni Angara ang posisyon nga usa ka dakong hagit alang niya.
Samtang si Senador Sherwin Gatchalian, chairman sa Senate Committee on Basic Education, nihatag og gibug-aton nga nakigtambayayong usab siya kang Angara sa 2nd Congressional Commission on Education kon EDCOM 2, mao nga nasayod siya nga maayong pilion siya sa maong posisyon.
Kahinumduman nga ni-resign si Bise Presidente Sara Duterte-Carpio isip Department of Education (DepEd) secretary.
Matod sa Presidential Communications Office, si VP Sara niabot sa Palasyo alas 2:21 sa hapon niadtong Hunyo 19, ug ni-resign sa iyang pagluwat isip sakop sa Gabinete isip DepEd secretary ug vice chairperson sa National Task Force to End Local Communist Armed Conflict. (NTF-ELCAC).
