GENERAL SANTOS CITY – Nagpagawas na usab ang Securities and Exchange Commission (SEC) ug advisory batok sa usa pa ka investment scheme nga nag-operate dinhi sa siyudad.
Base sa nasampit nga advisory, nakadawat ang komisyon ug impormasyon kalabot sa MUNIFICENCE MINISTRY, nga nagpaila isip non-profit organization nga ga-operate ilawom sa INTERDENOMINATIONAL EVANGELICAL CHURCH MINISTRIES, INC.
Natumbok nga ga-operate kini sa pipila ka bahin sa Mindanao partikular dinhi sa GenSan ug sa Tagum City.
Ginaawhag matud pa niini ang publiko pinaagi sa social media nga mag- invest bugti sa gisaad nga hilabihan kadako nga interes.
Base matud pa sa mga public posts sa MUNIFICENCE MINISTRY, aduna kini SEC Registration ug gatanyag ug interes nga “45% monthly payout, 45% lock-in 4 months” sa mga investors.
Gihingusgan usab sa SEC nga ang gikabutyag nga SEC Registration sa grupo ang gipanag-iyahan sa INTERDENOMINATIONAL EVANGELICAL CHURCH MINISTRIES, INC., nga sua ka religious non-stock corporation nga nakarehistro isip religious organization.
Samtang ang MUNIFICENCE MINISTRY ang dili matud pa rehistrado sa komisyon isip corporation or partnership.
Hinungdan nga dili kini otorisadong mag-solicit ug investments gikan sa publiko, ug unsa mang application for registration sa pag-solicit ug investments ang dili tugtan sa komisyon.
Dungan niini nagpahimangno ang SEC sa publiko nga mag-amping ug dili na mag-invest sa nasampit nga matang sa investment activity.
Kahinumduman nga kanhi na usab nagpagawas ang komisyon ug advisory batok sa uban pang investment group nga ALAMCCO, RIGEN ug ang KAPA nga ginapasirad-an na karon sa gobyerno ug na-freeze na ang bank assets.
