Gi-ila sa Integrated Bar of the Philippines ang gahom sa Korte Suprema sa gipagawas nilang desisyon nga nagdeklarang unconstitutional sa articles of impeachment batuk kang Vice President Sara Duterte.
Sa ilang gipagawas nga opisyal nga pamahayag, ilang gipadayag ang ilang pagsuporta sa deklarasyon sa Korte Suprema nga mi-ani og managlahing reaksyon tungod kay nagpawalay bili kini sa impeachment process nga gihimo sa House of Representatives.
Sigon sa Integrated Bar of the Philippines, dili lang alang sa judicial review o impeachment ang nahimong ruling sa Supreme Court kondili nakatutok lang sa pagpabilin sa kahapsay ug pag-ila sa konstitusyon aron masunod ang ‘rule of law’.
Bisan og gi-ila ang gahom sa Korte Suprema nga mag-interpret sa balaud ug maghatag og katin-awan sa mga implikasyon niini, wala matud pa kini nagpasabot nga gibalewala ang papel sa House of Representatives tungod kay ang ‘political nature’ sa impeachment, sakop gihapon ug mahimo pang ipa-ilalom sa ‘judicial review’ subay sa nakalatid sa konstitusyon.
Sa pagpatuman sa mandato sa Konstitusyon, girespeto matud pa nila ang exclusive power sa Kamara nga sugdan ang impeachment apan kinahanglang ilhon usab ang papel sa Korte Suprema nga ipasabot kung unsa ang nakalatid sa balaud.
