GENERAL SANTOS CITY – Gikahiusahan sa Sangguniang Bayan pinaagi sa committee en banc nga gipahigayon kagahapon nga magduso nga mupasa og resolusyon nga i-address sa Commission on Audit kon COA aron magpahigayon og imbestigasyon kalabot sa kontrobersiyal og kwestyunableng cash advances sa Malapatan.
Matud pa ni Malapatan Vice mayor Jimmy Baguit, ang COA lamang ang makasulti nga adunay paglapas sa gihimong pagpagawas sa dakong salapi gikan sa panudlanan sa maong munisipyo.
Kahibaluan nga gipatawag ang mga personalidad nga nalambigit sa kontrobersiya nga una nang nabulgar human nga nigawas sa social media.
Atol sa imbestigasyon, nihangyo ang municipal treasurer og municipal accountant nga hatagan sila og panahon una kumpirmahon nga ang katong withdrawals sa tseke nga nigawas sa social media mao ang mga cash advances sa Malapatan.
Gani, giklaro ni VM Baguit, ang cash advance tugutan lang og kausa kon adunay klarong Purpose o project design.
Dili tugutan ang pagpagawas og laing cash advance kon dili pa ma-liquidate ang unang cash advance nga gipagawas.
