Gitan-aw karon sa Sangguniang Panlungsod sa General Santos City ang pagbalhin sa mga tricycle gikan sa paggamit og makina nga gasolina ngadto sa electric tricycle isip kabahin sa plano sa pag-modernize sa pampublikong transportasyon sa dakbayan.
Sumala kang City Councilor Franklin Gacal, anaa na sa proseso sa pag-draft ang final version sa maong plano aron masuta ang mga angay nga lakang alang sa pagpatuman niini.
Matud ni Gacal, usa sa mga hinungdan sa maong lakang mao ang padayon nga pagsaka sa gasto sa gasolina nga dakong kabalaka sa mga tricycle driver.
Gilauman nga pinaagi sa paggamit sa electric tricycle, mahimong maminusan ang adlaw-adlaw nga gasto sa mga drayber ilabina sa ilang panginabuhian.
Gipasabot pa sa konsehal nga kabahin kini sa mga solusyon nga ilang gitutokan aron mapauswag ug ma-modernize ang sistema sa transportasyon sa General Santos City.
