Gipanghimakak ni kanhi presidential spokesperson Atty. Harry Roque ang mga pasangil nga nanghilabot siya sa dagan sa kaso ni kanhi Presidente Rodrigo Roa Duterte sa ICC.
Unang nibuto ang isyu human ang legal counsel ni Duterte nga si Atty. Nicholas Kaufman, mihimo og pahayag sa usa ka sinulat nga interbyu.
Nasayran nga si Roque gikatahong nagtrabaho aron kasuhan ang Dutch government tungod sa pagkatanggong kang FPRRD sa The Hague, Netherlands.
Gitawag pa kini sa abogado nga “crazy scheme” tungod kay kini nga mga lakang makapakomplikado gyud sa kaso sa ilang kliyente.
Siya miingon nga mas importante nga makigtambayayong sa Dutch Government kay sa pagkiha niini aron ang korte makahatag sa ilang interim release request.
Hinuon gipasabot ni Roque nga wala siya manghilabot sa kaso sa kanhi Presidente o moluwat og pamahayag nga makaapekto sa legal strategy sa ilang legal team.
Matod niya nga sama ra siya sa ubang supporters sa kanhi Presidente nga gusto siyang mobalik sa Pilipinas.
Bisan pa niini, gipasalig ni Roque nga magpabilin ang iyang suporta sa Legal Defense team sa kanhi presidente.
