Posibleng moubos ang presyo sa mga produktong petrolyo sa sunod nga semana human mikunhod ang epekto sa tensyon sa Middle East sa global nga presyo sa lana.
Matud ni Department of Energy–Oil Industry Management Bureau Director Rino Abad, hinay-hinay nang mikunhod ang epekto sa kagubot sa Middle East, hinungdan nga nakita ang gamay nga pagkunhod sa presyo sa lana sa miaging upat ka adlaw.
Base sa unang gibanabana sa DOE, posible nga moubos og P0.80 kada litro ang gasolina, P0.50 kada litro ang diesel, ug P2.30 kada litro ang kerosene.
Matud usab sa usa ka tinubdan gikan sa oil industry, posible nga moabot sa P1.00 hangtod P1.50 kada litro ang rollback sa gasolina, samtang P0.50 hangtod P1.00 kada litro usab sa diesel.
Gipasabot sa ahensya nga human mosaka sa kapin $100 kada baril ang presyo sa Brent crude oil tungod sa kabalaka sa suplay gikan sa Middle East, misugod kini og ubos human adunay paglaum sa ceasefire tali sa Estados Unidos ug Iran.
Bisan pa niini, limitado gihapon ang gipaabot nga rollback tungod kay hugot pa gihapon ang balanse tali sa suplay ug panginahanglan sa diesel ug gasolina.
Gilauman nga ipahibalo sa mga kompanya sa lana ang opisyal nga pagbag-o sa presyo karong Lunes, nga ipatuman sa sunod nga adlaw.
