Mitambong si General Santos City Representative Shirlyn Bañas sa selebrasyon sa ika-81 nga National Day sa Vietnam ug ika-50 nga anibersaryo sa diplomatikong relasyon tali sa Pilipinas ug Vietnam.
Gihimo ang maong selebrasyon sa Vietnamese Embassy sa Manila diin gipasalamatan ni Bañas si Vietnamese Ambassador Lại Thái Bình ug ang iyang asawa nga si Nguyen Thi Thu Thuy tungod sa imbitasyon ug maayong pagdawat.
Matud ni Bañas, nagpasiugda ang maong okasyon sa dugay nang panaghigalaay tali sa Pilipinas ug Vietnam, lakip ang importansya sa pagpadayon sa kooperasyon tali sa duha ka nasod.
Sa iyang post sa Facebook niadtong Sabado, Septiyembre 5, giila ni Bañas ang selebrasyon isip timaan sa duha ka importanteng milestone sa relasyon sa Pilipinas ug Vietnam.
Pormal nga natukod ang diplomatikong relasyon tali sa Pilipinas ug Vietnam niadtong Hulyo 12, 1976.
Gipahayag usab ni Bañas ang iyang paglaum nga magpadayon ang mas lig-on nga kooperasyon ug relasyon sa duha ka nasod, ilabina sa ilang paningkamot alang sa panaghigalaay, pagtinabangay ug mutual growth.
