M’LANG,NORTH COTABATO – Gikumpirma ni Police Insp. Hoslito Patrona, hepe sa M’lang Municipal Police Station nga napasakaan na og kasong frustrated homicide og homicide ang pulis nga nakapatay sa kaubang pulis.
Kagahapon sa hapon, malampusong gipasakaan og kaso si PO1 Virgil Rivera human nga gipusi patay si PO3 Lloyd Platoon, kinsa nadestino sa Aflik Police Community Center sa T’boli Sotuh Cotabato.
Hinuon, giklaro sa Chief of police nga nagpabiling gawasnon ang suspek nga si PO1 Rivera.
Apan gikanayon sa opisyal nga bisan pa og magtago-tago ang nasampit dili gihapon kini luwas kon mugawas na sa hingpit ang warrant of arrest niini.
Gidugang pa sa opisyal nga gitawgan niini ug balik ang labaw ni PO1 Rivera sa RPSB 11 alang sa koordinasyon sa posibleng gikahimutangan karon sa maong pulis.
Hugot usab ang koordinasyon sa M’lang Municipal Police Station sa pamilya ni PO1 Rivera aron pasurenderon ang nahisgutan.
Kahibaluan nga magparyentihanay lamang si PO1 Rivera og PO3 Platoon.
Natigayon ang pagpusilanay sa duha human ang wala pagkasinabtanay.
