GENSAN- Gipadayag ni Merly Lacrita, inahan ni Queenjo Lacrita usa ka Overseas Filipino Worker (OFW) nga namatay sa Dammam, Saudi Arabia niadtong Abril 8, nga naghulat na siya sa pag-abot sa patay’ng lawas sa iyang anak sa Pilipinas.
Sumala kaniya, gilauman nga moabot sa Manila ang lawas ni Queenjo sa ugmang adlawa, Abril 28 ug andam na sa pagsugat ang mga ahensya sama sa DMW, OWWA ug recruitment agency.
Giingon niya nga determinado siya nga ipa-autopsy ang lawas aron mahibal-an ang tinuod nga hinungdan sa kamatayon sa iyang anak.
Kung mapamatud-an nga adunay sayop, plano niya nga mopasaka og kaso aron makabaton og hustisya.
Giangkon usab niya nga nabuhi ang iyang anak og 15 ka adlaw lamang sa iyang amo sa Saudi ug mga duha ka bulan pa lang didto sa Dammam sa wala pa kini namatay.
Gi-awhag niya ang mga otoridad nga tabangan siya sa pagpangita sa hustisya alang sa iyang anak.
