Gipakusgan sa Public Safety Office o PSO sa General Santos City ang pagdumala sa trapiko sa palibot sa palengke pinaagi sa pag-deploy og mga traffic enforcers sa nagkadaiyang erya aron masiguro ang hapsay nga pagdagan sa mga sakyanan.
Matud ni Engr. Mylen Jecosala, Department Head sa Public Safety Office sa GenSan, gipakatap usab ang mga traffic team gikan sa Papa Six ug sa station commander nga kanunay nagamonitor sa sitwasyon sa trapiko. Gigamit usab ang drone aron masusi ang kahimtang sa trapiko ug mahibal-an dayon ang mga dapit nga adunay paghuot.
Lakip sa mga lakang nga gihimo ang pag-abli sa round ball aron makalihok og mas hapsay ang mga sakyanan ug malikayan ang pag-unot-unot, ilabi na ang mga gikan sa Bula nga nagahimo og U-turn.
Samtang, tungod sa kadaghan sa mga delivery truck nga moabot matag buntag, ginaplastar usab kini aron dili makababag sa dagan sa trapiko, ilabi na sa relocation area.
Sumala pa ni Jecosala, padayon ang pag-monitor sa mga traffic enforcers aron masiguro nga hapsay ang pagdagan sa mga sakyanan ug malikayan ang grabeng pagsinipit sa palibot sa palengke
