GENSAN– Gihingusgan ni PBGen. Arnold Ardiente, Regional Director sa Police Regional Office 12 nga ang kampanya batok sa ilegal nga droga ang alang sa tanang personalidad nga nalambigit sa paggamit ug pagpamaligya sa ilegal nga droga, bisan pa man kini mga high value target o street level individuals.
Matod pa ni Ardiente, basta adunay kalambigitan sa ilegal nga droga, kini awtomatikong mahimong subject sa operasyon sa kapulisan.
Daghan na ang mga nadakpan ug daghang nakumpiskang droga, apan iyang gipasabot nga dili kini nagpasabot nga misamot ang kadaghan sa ilegal nga droga sa rehiyon, kundili bunga kini sa agresibong mga operasyon nga gihimo sa PRO-12.
Gipasabot usab ni Ardiente nga hangtod karon, walay nareport o namonitor nga drug den sa rehiyon, timailhan nga epektibo ang gihimong kampanya batok droga sa ilang hurisdiksyon.
Kahinumduman nga sa miaging semana, duha ka high value individual ang nadakpan atol sa operasyon sa Purok Rajah Muda, Barangay Bula, GenSan diin nakumpiska gikan sa mga suspek ang droga nga nagbalor og ₱1.1 million.
