Dili na aprubahan sa Department of Trade and Industry ang bisan unsang pagsaka sa presyo sa pipila ka mga batakang palaliton sama sa pipila ka brand sa sardinas, instant noodles, Pinoy tasty ug Pinoy pandesal karong tuiga.
Butyag sa DTI nga anaa na sa kataposang mga hugna sa konsultasyon sa mga stakeholders sa ilang plano sa pagwagtang sa gisugyot nga retail price o SRP scheme nga naglungtad na sulod sa mga dekada.
Matod ni kanhi DTI Usec. Ruth Castelo, ang SRP maoy proteksiyon sa kinabag-an kay nagpugong kini sa mga tiggama sa pagpataas sa presyo. Hinuon, gipaboran sa DTI nga ibasura ang SRP scheme ug ilisan kini og price range guide para sa mga konsumidor.
Ubay-ubay sa mga sardine makers ug bread producers ang miuyon sa plano sa DTI nga tangtangon ang SRP ug pasagdan ang mga pwersa sa merkado ug kompetisyon.
Sa laing bahin, gidayeg sa pipila ka mga konsumidor ang pamahayag sa DTI nga dili na niini aprobahan ang pagsaka sa presyo sa pipila ka mga palaliton.
