Gipahibalo sa Department of Energy (DOE) nga gilauman nga adunay rollback sa presyo sa diesel ug kerosene sa sunod semana, samtang posible usab nga mosaka ang presyo sa gasolina.
Base sa upat ka adlaw nga trading monitoring sa Mean of Platts Singapore, gibanabana nga mokunhod ug mga ₱9 kada litro ang diesel, ug ₱12 kada litro ang kerosene.
Sa laing bahin, posible nga motaas ug ₱1.60 hangtod ₱1.70 kada litro ang gasolina.
Sumala ni DOE Oil Industry Management Bureau Director Rino Abad, hinay-hinay nang mibalik sa normal nga market-based pricing ang lana human maapektuhan sa tensyon sa Middle East nga nagsugod niadtong Pebrero.
Gisulti niya nga ang presyo sa lana sa kalibutanhong merkado karon anaa sa mga $70 hangtod $95 kada bariles, ug gilauman nga mobalik kini sa normal nga presyo nga $55 hangtod $65 kada bariles.
Ang mga kompanya sa lana mopahibalo sa opisyal nga presyo sa mga produktong petrolyo sa Lunes ug ipatuman kini sa Martes.
