Gitugotan na sa Department of Agriculture ang pag-import sa karne sa baboy gikan sa Spain human giila sa Pilipinas ang mga lakang nga gihimo niini batok sa African Swine Fever.
Gipirmahan na ni Agriculture Secretary Francisco Tiu Laurel Jr. ang bag-ong mando nga nagtugot pag-usab sa pag-import sa pork meat, panit sa baboy, ug uban pang by-products sa baboy.
Kahinumduman nga gipatuman ang temporaryong pagdili niadtong miaging tuig tungod sa mga kaso sa ASF sa pipila ka bahin sa Europa aron maprotektahan ang lokal nga industriya sa pagbuhi og baboy.
Sumala sa DA, adunay igo nga veterinary ug disease-control measures ang Spain nga makatabang sa pagpamenos sa risgo nga makasulod ang ASF pinaagi sa imported nga pork products.
Dugang pa nila, makatabang kini aron masiguro ang lig-on nga suplay sa karne sa baboy sa nasod samtang gipadayon ang hugot nga animal health standards.
