Posibleng makatabang kang Kanhi Pres. Rodrigo Duterte ang plano nga himuong adlaw-adlaw ang pagdungog sa kaso sa International Criminal Court aron mapaspasan ang proseso sa husay, sumala ni Atty. Rogelio Garcia.
Matud ni Garcia, gihangyo usab kini sa depensa pinaagi ni Attorney Haynes aron masiguro ang “speedy trial” alang sa kanhing pangulo. Kung andam na ang daghang mga testigo sa prosekusyon, posible matod pa niya nga mub-an ang gidugayon sa pagdungog sa kaso.
Apan, giingon usab ni Garcia nga usa sa mga gitan-aw nga isyu mao kung kinsa ang mogasto sa biyahe, kapuy-an ug uban pang galastuhan sa mga testigo nga gikan sa Pilipinas paingon sa The Hague. Wala pa matud pa niya matino kung ang International Criminal Court ba o ang prosecution office ang moatubang sa maong mga gasto.
Dugang pa niya, posible usab nga adunay mga grupo o supporters nga motabang sa pagpondo alang sa mga testigong motestigo batok kang Duterte sa kasong crime against humanity.
