GENERAL SANTOS CITY – Walay angayang kabalak-an ang katawhan sa subling paglugway sa pagpatuman sa Martial Law sa Mindanao.
Kini ang gipasalig ni Police Supt. Aldrin Gonzales, tigpamaba sa Police Regional Office 12, sa pakighinabi sa Bombo Radyo.
Sumala pa nga makasalig ang katawhan nga dili abusuhon sa kapulisan ug kasundaluhan ang gahum nga gihatag kanila, inay mas pakusgan lamang ang ilang pagpatuman sa balaod ug pagsiguro sa kalinaw ug seguridad sa katawhan batok sa terorismo.
Gikabutyag nga gikalipay sa PRO-12 ang subling paglugway sa martial law, nga dakong tabang alang kanila ug sa kasundaluhan aron mas mahimo pa ang ilang trabaho. Dugang pa ni Gonzales, lahi ang martial law kaniadto kaysa sa kasamtangang balaod-militar nga ginapatuman.
Ug gani, nakahimo gihapon gihapon matud pa ang ubang mga grupo partikular na ang mga walhong grupo sa pagpahigayon sa ilang mga gimbuhaton ug kalihukan batok sa gobyerno, nga posibleng mas samot pa kon ugaling walay gipatuman nga martial law.
Giawhag usab ni Supt. Gonzales ang katawhan nga makig-kooperar lamang kanila alang sa hapsay ug malinawon nga katilingban.
